राजा दळवी
कणकवली: रंगकर्मी, नाट्यदिग्दर्शक
सुहास वरूणकर
निधन;
रंगभूमीवर शोककळा
कणकवली:
कणकवली शहरातील छत्रपती शिवाजी महाराज नगर येथील रहिवासी, राज्य परिवहन महामंडळाच्या सिंधुदुर्ग विभागातील निवृत्त कर्मचारी, तसेच ज्येष्ठ रंगकर्मी, नाट्यदिग्दर्शक आणि अभिनेते सुहास वासुदेव वरूणकर (वय ६४) यांचे रविवारी सायंकाळी हृदयविकाराच्या तीव्र धक्क्याने निधन झाले. त्यांच्या पश्च्यात पत्नी, मुलगी आणि जावई असा परिवार आहे.
सांस्कृतिक क्षेत्रातील मोठी हानी
सुहास वरूणकर यांनी अक्षरसिंधू साहित्य कला मंचच्या माध्यमातून अनेक नाट्यकृतीमधून अभिनय केला, यशस्वी दिग्दर्शन केले आणि अनेक पुरस्कार प्राप्त केले. राज्य परिवहन महामंडळाच्या नाट्य स्पर्धेत त्यांनी सिंधुदुर्ग विभागाला अनेक पारितोषिके प्राप्त करून दिली होती. त्यांनी आपल्या कारकिर्दीत अनेक होतकरू कलावंत घडवले, ज्यामुळे सिंधुदुर्गच्या सांस्कृतिक वर्तुळात मोठी पोकळी निर्माण झाली आहे.
रुग्णालयात शहरवासीयांची गर्दी
रविवारी सायंकाळी त्यांना घरामध्येच अचानक अस्वस्थ वाटू लागले आणि ते खाली कोसळले. त्यानंतर त्यांना तात्काळ येथील उपजिल्हा रुग्णालयात दाखल करण्यात आले, मात्र उपचारापूर्वीच त्यांची प्राणज्योत मावळली. त्यांच्या निधनाची बातमी समजताच उपजिल्हा रुग्णालयात शहरवासीयांनी आणि कलाक्षेत्रातील नागरिकांनी मोठी गर्दी केली होती.
