राजा दळवी
कळसुली गावाची अभिमानास्पद कामगिरी!
‘आदिशक्ती पुरस्कार’
तालुकास्तरावर प्रथम ,
जिल्हास्तरावर द्वितीय क्रमांक
कळसुली (ता. कणकवली) :
महाराष्ट्र शासन महिला व बाल विकास विभागांतर्गत राबविण्यात येणाऱ्या ‘आदिशक्ती अभियाना’मध्ये कणकवली तालुक्यातील कळसुली गावाने चमकदार कामगिरी करत मोठा मान मिळवला आहे. महिलांच्या आर्थिक, सामाजिक, शैक्षणिक व आरोग्य विषयक सर्वांगीण विकासासाठी उत्कृष्टपणे हे अभियान राबविल्याबद्दल कळसुली गावाला तालुकास्तरावर प्रथम क्रमांक (१ लाख रुपयांचे पारितोषिक) आणि जिल्हास्तरावर द्वितीय क्रमांक (३ लाख रुपयांचे पारितोषिक) जाहीर झाले असून, या यशाने संपूर्ण परिसरात आनंदाचे वातावरण आहे.
.
दैदिप्यमान यशाची दखल घेत स्थानिक जिल्हापरिषद सदस्या सौ. शीतल दळवी यांनी आपल्या मतदारसंघातील ग्रामपंचायतीने जिल्हास्तरावर मजल मारल्याबद्दल सार्थ अभिमान व्यक्त केला आहे. कळसुली गावाच्या या उल्लेखनीय यशाबद्दल ‘आदिशक्ती अभियान समिती’च्या अध्यक्षा सौ. शुभदा (भारती) देसाई, सचिव श्रीमती माधवी दळवी तसेच इतर सर्व सन्माननीय सदस्यांचा पुष्पगुच्छ देऊन विशेष सत्कार करण्यात आला व त्यांचे अभिनंदन करण्यात आले.
या अभिनंदनाप्रसंगी व सत्कार करताना माजी सरपंच अतुल दळवी, जयवंत गावकर, स्वप्निल गोसावी, अरुण दळवी, अमित दळवी, गणेश पाडावे, मोहन दळवी ,एकनाथ दळवी, आदी परिसरातील ग्रामस्थ मोठ्या संख्येने उपस्थित होते. महिलांच्या सबलीकरणासाठी आणि गावाच्या प्रगतीसाठी ग्रामपंचायत व समिती सदस्यांनी घेतलेल्या मेहनतीचे या वेळी उपस्थितांकडून भरभरून कौतुक करण्यात आले.
