राजा दळवी
५ नवीन ‘जिजाऊ’ बसेस;
पालकमंत्र्यांच्या हस्ते लोकार्पण
देवगड:
सिंधुदुर्ग जिल्ह्यातील देवगड एसटी आगाराला प्रवाशांच्या सेवेसाठी पाच नवीन अत्याधुनिक ‘जिजाऊ’ बसेस प्राप्त झाल्या आहेत. या नवीन बससेवेचे लोकार्पण आज सिंधुदुर्गचे पालकमंत्री नितेश राणे यांच्या हस्ते उत्साहात संपन्न झाले. पालकमंत्री राणे यांनी फित कापून या बससेवेचा शुभारंभ केला, तर सभापती गणेश राणे यांनी श्रीफळ अर्पण करून बसेसचे विधिवत पूजन केले.
प्रवाशांना मिळणार सुखकर प्रवासाचा अनुभव
लोकार्पण सोहळ्यानंतर पालकमंत्री नितेश राणे यांनी नवीन बसेसची पाहणी केली. या बसेस अत्यंत आरामदायी असून, यामुळे प्रवाशांना अधिक सुरक्षित आणि सुखकर प्रवासाचा अनुभव मिळेल, असा विश्वास त्यांनी व्यक्त केला. तसेच, एसटी महामंडळाच्या अधिकाऱ्यांशी संवाद साधताना प्रवाशांना दर्जेदार, वेळेवर आणि विश्वासार्ह सेवा देण्याचे निर्देश त्यांनी दिले.
एसटी बस प्रवासाचे नागरिकांना आवाहन
यावेळी बोलताना पालकमंत्री नितेश राणे यांनी देवगडकरांना खासगी वाहनांऐवजी एसटी बससेवेचा अधिकाधिक वापर करण्याचे आवाहन केले. या नवीन बसेसमुळे देवगड तालुक्यातील प्रवाशांची सोय होणार असून, सार्वजनिक परिवहन सेवा अधिक सक्षम होणार आहे.
दिग्गजांची उपस्थिती
या कार्यक्रमाला माजी आमदार अजित गोगटे, विभाग नियंत्रक दीपक घोडे, संदीप साटम, बाळ खडपे, तालुकाध्यक्ष राजा भुजबळ, सचिव योगेश चांदोसकर, देवगड आगार व्यवस्थापक सौरभ औंधकर, यंत्र अभियंता, स्थानक प्रमुख डोंगरे यांच्यासह विविध पदाधिकारी, एसटीचे अधिकारी, कर्मचारी आणि नागरिक मोठ्या संख्येने उपस्थित होते.
