पोलीस शहीद स्मृतिदिन: सिंधुदुर्गच्या ओरोस येथे वीर जवानांना शासकीय इतमामात भावपूर्ण श्रद्धांजली ​- पालकमंत्री नितेश राणे यांच्याकडून पुष्पचक्र अर्पण करून शहीद जवानांना अभिवादन

​पोलीस शहीद स्मृति

सिंधुदुर्गच ओरोस 

वीर जवान

पुष्पचक्र अर्पण 

 भावपूर्ण श्रद्धांजली

​– पालकमंत्री नितेश राणे  

– ओरोस जिल्हा पोलीस परेड ग्राउंडवर पार पडला मुख्य कार्यक्रम

​ओरोस (प्रतिनिधी) :

देशाची सुरक्षा, कायदा व सुव्यवस्था राखताना तसेच नागरिकांच्या जीवित व मालमत्तेचे संरक्षण करताना कर्तव्य बजावताना सर्वोच्च बलिदान देणाऱ्या वीर पोलीस अधिकारी व कर्मचाऱ्यांना ‘पोलीस शहीद स्मृतिदिनानिमित्त’ सिंधुदुर्ग जिल्ह्याच्या वतीने भावपूर्ण श्रद्धांजली अर्पण करण्यात आली. ओरोस येथील जिल्हा पोलीस परेड ग्राउंडवर आयोजित मुख्य शासकीय कार्यक्रमात पालकमंत्री तथा मत्स्यव्यवसाय व बंदरे विकास मंत्री ना. नितेश राणे यांनी शहीद जवानांच्या स्मृतीस्तंभास पुष्पचक्र अर्पण करून आदरांजली वाहिली.

​यावेळी पोलीस दलाच्या वतीने शिस्तबद्ध संचलन करण्यात आले. तसेच बंदुकीच्या फैरी झाडून आणि शस्त्रे खाली नमवून देशासाठी प्राणार्पण करणाऱ्या वीर जवानांना मानवंदना देण्यात आली.

​शौर्य आणि समर्पणाचे स्मरण

देशाच्या संरक्षणासाठी आणि नागरिकांच्या सुरक्षिततेसाठी पोलीस दलातील अधिकारी व कर्मचारी अहोरात्र कर्तव्य बजावत असतात. हे कर्तव्य पार पाडताना अनेकांना आपल्या प्राणांचे बलिदान द्यावे लागले आहे. लडाखमधील बर्फाच्छादित आणि निर्जन भागात कर्तव्य बजावताना वीरमरण आलेल्या केंद्रीय राखीव पोलीस दलाच्या जवानांसह १ सप्टेंबर २०२५ ते ३१ ऑगस्ट २०२६ या कालावधीत देशाच्या सेवेत प्राणार्पण करणाऱ्या सर्व पोलीस अधिकारी व कर्मचाऱ्यांच्या बलिदानाचे यावेळी स्मरण करण्यात आले. प्रतिकूल परिस्थितीतही देशाची सुरक्षा आणि नागरिकांचे संरक्षण हे कर्तव्य सर्वोच्च मानून काम करणाऱ्या या जवानांच्या शौर्याप्रती उपस्थितांनी कृतज्ञता व्यक्त केली.

​शहीद कुटुंबीयांच्या पाठीशी शासन आणि समाज

कार्यक्रमादरम्यान पालकमंत्री आणि उपस्थित मान्यवरांनी शहीद जवानांच्या कुटुंबीयांची भेट घेऊन त्यांच्या त्यागाप्रती आदर व्यक्त केला. देशाच्या संरक्षणासाठी आपल्या कुटुंबातील कर्ता सदस्य गमावलेल्या कुटुंबीयांचे योगदान अत्यंत मोलाचे असून, त्यांच्या दुःखात शासन आणि समाज ठामपणे पाठीशी उभा आहे, अशी भावना यावेळी व्यक्त करण्यात आली. शहीद जवानांचे हे सर्वोच्च बलिदान कधीही विसरता येणार नाही, असेही यावेळी सांगण्यात आले.

​मान्यवरांची प्रमुख उपस्थिती

या कार्यक्रमास जिल्हाधिकारी तृप्ती धोडमिसे, जिल्हा पोलीस अधीक्षक डॉ. मोहन दहिकर, अपर पोलीस अधीक्षक नयोमी साटम, जिल्हा परिषद अध्यक्ष प्रमोद कामत, उपाध्यक्ष दादा साईल यांच्यासह पोलीस दलातील वरिष्ठ अधिकारी, शासकीय यंत्रणेतील अधिकारी आणि नागरिक मोठ्या संख्येने उपस्थित होते.

​कर्तव्य, शौर्य, निष्ठा आणि समर्पण या मूल्यांची जपणूक करणाऱ्या पोलीस दलातील सर्व अधिकारी व जवानांच्या कार्याला यावेळी मानाचा मुजरा करण्यात आला.