राजा दळवी
संदीप चौकेकर मित्र मंडळ शिरवल
नवदुर्गा माता
दर्शन!
नगराध्यक्ष संदेश पारकर
‘संदीप चौकेकर यांच्यासारखे सामाजिक भान जपणारे कार्यकर्ते प्रत्येक गावात निर्माण व्हावेत’; ग्रामीण विकासासाठी संदेश पारकर यांच्याकडून कौतुक
कणकवली (प्रतिनिधी, कोकण राज लाईव्ह):
कणकवली तालुक्यातील शिरवल येथे ‘संदीप चौकेकर मित्रमंडळ’ आयोजित शारदीय नवरात्रोत्सवानिमित्त कणकवलीचे नगराध्यक्ष संदेश पारकर यांनी श्री नवदुर्गा मातेचे दर्शन घेतले. यावेळी मित्रमंडळाचे अध्यक्ष संदीप चौकेकर यांच्या हस्ते नगराध्यक्ष संदेश पारकर यांचा भगवी शाल व श्रीफळ देऊन स्नेहादरयुक्त सत्कार करण्यात आला.
या प्रसंगी उपस्थितांशी संवाद साधताना संदेश पारकर यांनी संदीप चौकेकर यांच्या सामाजिक आणि क्रीडाविषयक कार्याचे भरभरून कौतुक केले. ग्रामीण भागाचा सर्वांगीण विकास साधण्यासाठी समाजाभिमुख आणि सामाजिक भान जपणाऱ्या कार्यकर्त्यांची नितांत गरज असल्याचे प्रतिपादन त्यांनी केले.
महाकाली, महालक्ष्मी आणि महासरस्वतीच्या उपासनेतून प्रगतीचा संदेश
नवरात्रोत्सवाचे आध्यात्मिक महत्त्व विशद करताना संदेश पारकर म्हणाले, “महाकालीचे रूप समाजातील दुर्गुणांचा नाश करण्याची प्रेरणा देते, महालक्ष्मीचे आशीर्वाद जीवनात वैभव आणि समृद्धी आणतात, तर महासरस्वतीची उपासना ज्ञान आणि प्रगतीचा मार्ग दाखवते. देवीच्या पूजनासोबतच प्रत्येकाने आपल्या गावाच्या आणि तालुक्याच्या प्रगतीसाठी प्रामाणिक प्रयत्न केले पाहिजेत.”
‘सत्ता असो वा नसो, जनसेवा महत्त्वाची!’
संदीप चौकेकर यांच्या उपक्रमांचा उल्लेख करताना पारकर म्हणाले, “कणकवलीच्या ग्रामीण भागात तरुणांना संधी उपलब्ध करून देणे, सामाजिक व क्रीडाविषयक वातावरण निर्मिती करणे हे चौकेकर यांचे मुख्य वैशिष्ट्य आहे. सत्ता असो वा नसो, पद असो वा नसो; नागरिकांच्या सुख-दुःखात धावून जाणे हीच खरी सामाजिक बांधिलकी आहे. संदीप चौकेकर यांच्या कामात कोणताही स्वार्थ नसून जनतेची सेवा हीच त्यांची भावना आहे. त्यामुळे शिरवलवासीयांनी व तालुक्यातील जनतेने अशा कार्यकर्त्याच्या पाठीशी खंबीरपणे उभे राहिले पाहिजे.”
तसेच, तरुणांच्या हाताला रोजगार मिळवून देणे, गावातील समस्या सोडवणे आणि अडचणींवर मात करत जनसेवा सुरू ठेवण्याचे आवाहन पारकर यांनी चौकेकर यांना केले. देवीच्या चरणी प्रार्थना करताना त्यांनी शिरवलवासीयांना उदंड आरोग्य, सुख-समृद्धी लाभावी अशा शुभेच्छा दिल्या.
संदीप चौकेकर यांच्याकडूनही कृतज्ञता व्यक्त
यावेळी संदीप चौकेकर यांनी नगराध्यक्ष संदेश पारकर यांचे आभार मानले. पारकर यांच्या सर्व मनोकामना पूर्ण व्हाव्यात आणि त्यांना उत्तम आरोग्य लाभावे, अशी प्रार्थना दुर्गामातेच्या चरणी केल्याचे चौकेकर यांनी सांगितले.
या सोहळ्याला शिरवल ग्रामपंचायतीचे उपसरपंच प्रवीण तांबे, सामाजिक कार्यकर्ते निखित मूरकर, पत्रकार तुळशीदास कुडतरकर, सुनील कुडतडकर, कृष्णा यादव यांच्यासह संदीप चौकेकर मित्रमंडळाचे सर्व पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.
