राजा दळवी
कणकवली कळसुली
कै. बाबा डोंगरे गुरुजीं
१२ वी पुण्यतिथी;
ज्येष्ठ नागरिकांचा सन्मान
स्मृतीसंवाद कार्यक्रम
कणकवली / सिंधुदुर्ग :
काही व्यक्ती काळाच्या पडद्याआड जातात, मात्र त्यांचे विचार, संस्कार, कार्य आणि माणुसकीचा वारसा अनेक पिढ्यांना कायम प्रेरणा देत राहतो. याच विचारातून कणकवली तालुक्यातील कळसुली – दिंडवणे येथे सावंत फाउंडेशन परिवाराच्या वतीने कै. पांडुरंग सीताराम सावंत (बाबा डोंगरे गुरुजी) यांची १२ वी पुण्यतिथी स्मृतिपूजन, स्मृतीसंवाद आणि ज्येष्ठ नागरिक सन्मान सोहळ्याने अत्यंत आत्मीयतापूर्ण वातावरणात साजरी करण्यात आली.
दीपप्रज्वलन व आदरांजली
कार्मक्रमाची सुरुवात दिपप्रज्वलन करून करण्यात आली. यानंतर कै. बाबा डोंगरे गुरुजी यांच्या प्रतिमेस पुष्पहार अर्पण करून उपस्थितांनी आदरांजली वाहली. शेती, शिक्षण, निसर्ग, गावजीवन आणि सामाजिक बांधिलकी यांच्याशी अतूट नाळ जोडलेल्या बाबा डोंगरे गुरुजींच्या प्रेरणादायी जीवनकार्याला या वेळी उपस्थितांनी उजाळा दिला.
स्मृतीसंवाद आणि जुन्या आठवणींना उजाळा
कार्यक्रमाचा मुख्य भाग असलेल्या ‘स्मृतीसंवाद’ सत्रात भाई गुरुजी यांनी आपल्या मनोगतात आजोबांपासूनच्या कुटुंबीयांच्या आठवणींना उजाळा दिला. विविध पिढ्यांचे योगदान, कौटुंबिक जिव्हाळा आणि जुन्या पिढीने जपलेली मूल्ये नव्या पिढीपर्यंत पोहोचविण्याचे महत्त्व या संवादातून अधोरेखित करण्यात आले. उपस्थित मान्यवरांनी व हितचिंतकांनीही बाबा डोंगरे गुरुजींच्या आठवणींना उजाळा देत त्यांच्या जीवनमूल्यांवर प्रकाश टाकला.
ज्येष्ठ नागरिकांचा सन्मान – एक भावस्पर्शी क्षण
समाजाच्या जडणघडणीत मोलाचे योगदान देणाऱ्या, प्रदीर्घ अनुभव असलेल्या ज्येष्ठ नागरिकांचा सावंत फाउंडेशन परिवाराच्या वतीने या वेळी ब्लँकेट देऊन सन्मान करण्यात आला. ज्येष्ठांप्रती आदर, कृतज्ञता आणि आपुलकी व्यक्त करणारा हा क्षण कार्यक्रमातील अत्यंत भावस्पर्शी ठरला. यानंतर झालेल्या स्नेहमेळाव्यात उपस्थितांना एकमेकांशी संवाद साधण्याची संधी मिळाली. तसेच नवरात्रोत्सवानिमित्त उपस्थित सुहासिनींची पारंपरिक पद्धतीने खणा-नारळाने ओटी भरण्यात आली.
सावंत फाउंडेशनचा व्यापक संकल्प
कै. बाबा डोंगरे गुरुजींच्या जीवनातील मूल्ये आणि कार्याची प्रेरणा पुढील पिढीपर्यंत पोहोचावी, यासाठी सावंत फाउंडेशन परिवाराने दरवर्षी जानेवारी आणि ऑक्टोबर महिन्यात ‘बाबा डोंगरे गुरुजी स्मृती संवाद व व्याख्यानमाला’ आयोजित करण्याचा व्यापक संकल्प व्यक्त केला आहे. या माध्यमातून शेती, शिक्षण, पर्यावरण, ग्रामविकास आणि बदलत्या गावजीवनावर विचारमंथन घडवून आणण्याचा मानस आहे.
कुटुंबीय, ग्रामस्थ आणि हितचिंतकांच्या सहकार्याने पार पडलेल्या या छोटेखानी व आत्मीयतापूर्ण कार्यक्रमामुळे कळसुली परिसरात सामाजिक सलोख्याचे आणि आदराचे वातावरण पाहायला मिळाले.
