राजा दळवी
.
प्रशासनाने गतीने काम करावे..
शासनाच्या सेवा नागरिकांपर्यंत …
पालकमंत्री नितेश राणे
सिंधुदुर्गनगरी (प्रतिनिधी):
कणकवली येथे आयोजित ‘छत्रपती शिवाजी महाराज महाराजस्व समाधान शिबिर अभियाना’चा शुभारंभ पालकमंत्री नितेश राणे यांच्या हस्ते पार पडला. दुर्गम व डोंगराळ भागातील नागरिकांना ऑफलाइन पद्धतीने शासकीय सेवा उपलब्ध करून देण्यावर विशेष भर दिला जाईल, असे प्रतिपादन त्यांनी याप्रसंगी केले.
सर्वसामान्य नागरिकांना शासनाच्या सेवा जलद, पारदर्शक आणि प्रभावी पद्धतीने उपलब्ध करून देणे हे प्रशासनाचे प्रमुख उद्दिष्ट आहे. ‘छत्रपती शिवाजी महाराज महाराजस्व समाधान शिबिर अभियान’ ही संकल्पना त्याच उद्देशाने राबविण्यात येत आहे. या अभियानाच्या माध्यमातून अधिक गतीने काम करून जास्तीत जास्त नागरिकांपर्यंत शासनाचे लाभ पोहोचवून छत्रपती शिवाजी महाराजांचे रयतेचे राज्य साकार करण्याचे आवाहन मत्स्यव्यवसाय व बंदरे मंत्री तथा सिंधुदुर्ग जिल्ह्याचे पालकमंत्री नितेश राणे यांनी केले.
मुख्यमंत्री देवेंद्र फडणवीस यांच्या वाढदिवसानिमित्त तसेच माजी उपमुख्यमंत्री स्व. अजित पवार यांच्या जयंतीचे औचित्य साधून कणकवली येथे आयोजित या अभियानाचा शुभारंभ पालकमंत्री श्री. राणे यांच्या हस्ते दीपप्रज्वलनाने झाला.
योजनांची पाहणी व वितरण: प्रारंभी पालकमंत्र्यांनी विविध विभागांच्या स्टॉल्सना भेट देऊन पाहणी केली आणि प्रातिनिधिक लाभार्थ्यांना प्रमाणपत्रांचे वितरण केले.
दुर्गम भागासाठी ऑफलाइन सेवा: सिंधुदुर्गच्या भौगोलिक परिस्थितीनुसार अनेक सेवा ऑनलाइन असला तरी दुर्गम व डोंगराळ भागातील नागरिकांना त्या सहज मिळत नाहीत; यासाठी विशेष प्रयत्न करून ऑफलाइन सेवा पुरवणार असल्याचे स्पष्ट करण्यात आले.
पारदर्शक कारभार: महसूल मंत्री चंद्रशेखर बावनकुळे यांच्या मार्गदर्शनाखाली जिल्ह्यातील तीनही विधानसभा मतदारसंघांत हे अभियान प्रभावीपणे राबविले जात असून, लाभार्थ्यांची निवड पूर्णपणे पारदर्शक पद्धतीने व्हावी, अशी अपेक्षा व्यक्त करण्यात आली.
प्रशासन आणि नागरिकांचा संवाद: जिल्हाधिकारी तृप्ती धोडमिसे यांनी मनोगतात सांगितले की, या अभियानामुळे प्रशासन आणि नागरिक यांच्यातील संवाद दृढ झाला आहे. पोलीस अधीक्षक डॉ. मोहन दहीकर यांनी आपत्कालीन मदतीसाठी ११२ या हेल्पलाईन क्रमांकाचा वापर करण्याचे आवाहन केले.
