राजा दळवी
हरित-स्वच्छ झारापची पुन्हा चर्चा;
कुडाळ प्रतिनिधी :-
सिंधुदुर्ग जिल्ह्यातील झाराप ग्रामपंचायतीने राबवलेल्या “हरित आणि स्वच्छ ग्राम” उपक्रमाची सध्या सर्वत्र चर्चा रंगली आहे. गावाची स्वच्छता आणि नियोजनाचा आदर्श इतका प्रभावी आहे की, आता प्रत्यक्ष पाहणी करण्यासाठी आजरा पंचायत समितीची एक विशेष टीम आगामी दोन दिवसांत झारापमध्ये दाखल होणार आहे. जिल्हा परिषदेच्या ग्रामपंचायत विभागाचे उपमुख्य कार्यकारी अधिकारी जयप्रकाश परब यांनी ही माहिती दिली आहे.
लोकसहभागातून बदलली गावाची प्रतिमा
ग्रामपंचायतीने राबवलेल्या ओला आणि सुका कचरा वर्गीकरण मोहिमेला गावकऱ्यांचा मोठा प्रतिसाद मिळत आहे. या बदलामुळे गावातील वातावरण इतके प्रसन्न झाले आहे की, आता गावात कुठेही कचरा टाकण्यापूर्वी नागरिक दोनदा विचार करत आहेत. शाळा, अंगणवाड्या आणि सार्वजनिक परिसरातील सातत्यपूर्ण स्वच्छता अभियानामुळे गावाला ‘हरित’ लूक मिळाला आहे.
झाराप ” गावातील मुख्य रस्त्यांपासून ते अगदी अंतर्गत वाड्यावस्त्यांपर्यंत करण्यात आलेली स्वच्छता, प्लास्टिकमुक्त अभियानाची अंमलबजावणी, सार्वजनिक ठिकाणचे सुशोभीकरण यामुळे झारापने एक वेगळी ओळख निर्माण केली आहे.
अभ्यासाचा विषय बनले झाराप
झारापच्या या यशस्वी उपक्रमामुळे हे गाव आता अभ्यासाचे केंद्र बनले आहे. स्थानिक नागरिक म्हणतात, “आधी लोक पाहायला यायचे, आता समित्याच अभ्यासासाठी येतात.” आजरा पंचायत समितीच्या तज्ज्ञांचे पथक या दौऱ्यात ग्रामपंचायतीचे नियोजन आणि राबवलेले उपक्रम समजून घेणार आहे.
या उपक्रमामुळे झाराप ग्रामपंचायतीचे नाव जिल्हास्तरावर चमकले असून, गावकऱ्यांमध्ये उत्साहाचे वातावरण पाहायला मिळत आहे.
