राजा दळवी
सावंतवाडी
कचरा ‘हॉटस्पॉट’
सीसीटीव्हीची नजर
सावंतवाडी | राजू तावडे
सावंतवाडी शहरातील सार्वजनिक ठिकाणी उघड्यावर कचरा टाकणाऱ्यांवर आता थेट सीसीटीव्ही कॅमेऱ्यांची नजर राहणार आहे. शहरातील कचरा समस्येला आळा घालण्यासाठी आणि कचरा टाकणाऱ्यांवर पुराव्यानिशी कारवाई करण्यासाठी सावंतवाडी नगरपरिषदेच्या आरोग्य विभागाने अत्यंत महत्त्वपूर्ण पाऊल उचलले आहे. नगरसेवक देव्या सूर्याजी यांच्या मागणीनंतर शहरातील तीन प्रमुख ‘हॉटस्पॉट’वर सीसीटीव्ही कार्यान्वित करण्यात आले आहेत.
सावंतवाडी नगरपरिषदेच्या नुकत्याच झालेल्या सर्वसाधारण सभेत नगरसेवक देव्या सूर्याजी यांनी शहरातील कचरा समस्येचा मुद्दा प्रभावीपणे मांडला होता. उपनगराध्यक्ष अनिल निरवडेकर यांच्या अध्यक्षतेखाली झालेल्या या सभेत, ज्या ठिकाणी नागरिक किंवा व्यावसायिक मोठ्या प्रमाणावर कचरा टाकतात, अशा ठिकाणांवर सीसीटीव्हीची देखरेख असावी, अशी आग्रही मागणी त्यांनी केली होती. या मागणीची तातडीने दखल घेत आरोग्य विभागाने तातडीने कार्यवाही केली आहे.
कुठे बसवले कॅमेरे?
शहरातील ज्या ठिकाणी कचरा टाकण्याचे प्रमाण सर्वाधिक आहे, अशा तीन महत्त्वाच्या ठिकाणी हे कॅमेरे बसवण्यात आले आहेत:
- चेतन नेवगी यांच्या घराशेजारील पाणंद
- कोठावळे पाणंद
- सबनिसवाडा (सार्वजनिक शौचालय परिसर)
स्वच्छतेला मिळणार बळकटी
या उपक्रमामुळे उघड्यावर कचरा टाकणाऱ्यांवर कायदेशीर आणि दंडात्मक कारवाई करणे प्रशासनाला सोपे होणार आहे. “सीसीटीव्हीमुळे कचरा टाकणाऱ्यांवर वचक बसेल आणि शहरात उघड्यावर कचरा टाकण्याचे प्रमाण निश्चितच कमी होईल. यामुळे सावंतवाडी शहराच्या स्वच्छतेच्या मोहिमेला नक्कीच मोठी मदत होईल,” असा विश्वास नगरसेवक देव्या सूर्याजी यांनी व्यक्त केला आहे.
या मागणीची त्वरित दखल घेतल्याबद्दल नगरसेवक श्री. सूर्याजी यांनी तत्कालीन प्र. नगराध्यक्ष ॲड. अनिल निरवडेकर, नगरपरिषद प्रशासन आणि आरोग्य विभागाचे विशेष आभार मानले आहेत
