राजा दळवी
झारापच्या प्रगतीला ब्रेक
कुडाळ प्रतिनिधी :ता. 1
झाराप ग्रामपंचायतीत सध्या एक भन्नाट परिस्थिती निर्माण झाली आहे. सरपंच दक्षता मेस्त्री यांच्यावरील अविश्वास ठरावाच्या अंमलबजावणीस सिंधुदुर्ग जिल्हाधिकारी तृप्ती धोंडोमिसे यांनी स्थगिती दिल्यानंतर सरपंच पुन्हा कारभारावर आल्या. मात्र खातेबदलाचा विषय आला की ग्रामपंचायतीतील काहींच्या चेहऱ्यावरचे भाव पाहण्यासारखे झाल्याची चर्चा गावभर रंगली आहे.
गावकऱ्यांच्या भाषेत सांगायचे तर, “सरपंचांना गाडी दिली खरी, पण चावी मात्र अजूनही कुणाच्या तरी खिशातच आहे!” त्यामुळे ग्रामपंचायतीचा कारभार सध्या पहिल्या गिअरमध्येच अडकून पडल्याची मिश्किल चर्चा सुरू आहे.
एक ग्रामस्थ तर म्हणाले, “सरपंच कार्यालयात आल्या, खुर्चीत बसल्या, फाईल उघडली… पण खातेबदलाचा विषय निघताच कुणीतरी ‘नेटवर्क एरर’ दाखवतो!”
गावातील चहाच्या टपरीवर तर या विषयावर नवेच संशोधन सुरू आहे. काहींचे म्हणणे आहे की, “झारापच्या विकासाची गाडी धावत सुटेल या भीतीने काही जण ब्रेकवर पाय ठेवून बसले आहेत.”
तर दुसऱ्या एका नागरिकाने टोला लगावत म्हटले, “हे खातेबदलाचे प्रकरण म्हणजे लग्न झाल्यानंतर वराला घरात प्रवेश आहे, पण कपाटाची चावी नाही; अशी अवस्था झाली आहे!”
दरम्यान, गावात एक नवा प्रश्न चर्चेत आला आहे — “खातेबदलाला एवढा विरोध आहे, म्हणजे त्या खात्यात खजिना आहे की गावाचा विकास?”
झारापकर मात्र या सगळ्या घडामोडीकडे मजेशीर नजरेने पाहत आहेत. कारण गावात आता अशी चर्चा सुरू आहे की,
“विकासाची गाडी तयार आहे, चालकही तयार आहे… फक्त ब्रेकवर बसलेले प्रवासी खाली उतरायचे बाकी आहेत!”
आणि म्हणूनच गावकऱ्यांचा सवाल — झारापच्या प्रगतीला ब्रेक लावणारे चेहरे अखेर उघड होणार का?
