राजा दळवी
महामार्ग टोल वसुली
अधिसूचनेत माफीचा विषय
: परशुराम उपरकर
कणकवली:
पालकमंत्री नितेश राणे यांनी जाहीर केलेल्या टोलमाफीच्या घोषणेवरून ठाकरे शिवसेनेचे नेते तथा माजी आमदार परशुराम उपरकर यांनी गंभीर प्रश्न उपस्थित केले आहेत. कणकवली येथील संपर्क कार्यालयात आयोजित केलेल्या पत्रकार परिषदेत त्यांनी महामार्गाची अपूर्ण कामे, टोलमाफीचा अभाव आणि आरोग्य व्यवस्थेच्या ढासळलेल्या स्थितीवर ताशेरे ओढले.
टोलमाफीचा प्रश्न अंधारात: पालकमंत्र्यांनी आपल्या वाढदिवसानिमित्त ओसरगाव टोल नाक्यावर ‘एमएच ०७’ (MH 07) गाड्यांना टोलमाफीची घोषणा केली होती. मात्र, राष्ट्रीय महामार्ग प्राधिकरणाने काढलेल्या अधिकृत अधिसूचनेत या टोलमाफीचा कोणताही उल्लेख नसल्याचा दावा उपरकर यांनी केला आहे. अंमलबजावणी होत नसेल तर ही जनतेची दिशाभूल असल्याचे सांगत, आवश्यकता भासल्यास आंदोलनाचा इशाराही त्यांनी दिला.
मुंबई-गोवा महामार्गाची दुरवस्था: मुंबई-गोवा महामार्गाचे काम आजही अपूर्ण असून रस्त्यांवर मोठे खड्डे पडले आहेत. आगामी गणेशोत्सवासाठी कोकणात येणाऱ्या चाकरमान्यांना या खराब रस्त्यांवरून प्रवास करावा लागणार असून, या स्थितीसाठी स्थानिक लोकप्रतिनिधी जबाबदार असल्याची टीका त्यांनी केली.
विमानतळाची घोषणा हवेतच: १५ ऑगस्ट रोजी विमानतळावर विमान उतरवण्याची घोषणा करण्यात आली होती, परंतु त्याची पूर्तता झाली नसल्यामुळे जनतेच्या पदरी केवळ निराशा पडल्याचे ते म्हणाले.
आरोग्य यंत्रणा आणि विकासकामांवर ताशेरे: पालकमंत्र्यांच्या मतदारसंघातील आरोग्य यंत्रणा ढासळली असून सर्वसामान्य जनतेला याचा आर्थिक फटका बसत आहे. तसेच विकासकामांच्या दर्जात कथित टक्केवारीच्या व्यवहारामुळे कामे निकृष्ट होत असल्याचा आरोप त्यांनी केला.
