राजा दळवी
कर्मचाऱ्याला विजेचा धक्का
सुदैवाने बचावले प्राण
सावंतवाडी | प्रतिनिधी
सावंतवाडी तालुक्यातील कारिवडे येथे महावितरणच्या एका कर्मचाऱ्याला कर्तव्य बजावत असताना विजेचा तीव्र धक्का लागल्याची धक्कादायक घटना समोर आली आहे. सकाळी नऊच्या दरम्यान विज दुरुस्तीचे काम करत असताना अचानक बसलेल्या जोरदार विजेच्या धक्क्यामुळे संबंधित कर्मचारी खांबावरून थेट जमिनीवर कोसळले. मात्र, सुदैवाने या गंभीर अपघातातून ते बचावले असून त्यांची प्रकृती आता स्थिर असल्याची माहिती मिळत आहे.
प्रज्योत नाईक असे या जखमी कर्मचाऱ्याचे नाव असून ते महावितरणमध्ये कार्यरत आहेत. कारिवडे गावात विद्युत वाहिनीच्या दुरुस्तीचे काम सुरू असताना अचानक त्यांना विजेचा जोरदार धक्का बसला. या धक्क्याच्या तीव्रतेमुळे त्यांचे नियंत्रण सुटले आणि ते खांबावरून खाली कोसळले.
नागरिकांकडून तात्काळ मदत
ही घटना घडताच परिसरातील सतर्क ग्रामस्थ आणि त्यांच्या सहकारी कर्मचाऱ्यांनी मदतीसाठी तात्काळ धाव घेतली. वेळ न घालवता प्रज्योत नाईक यांना तातडीने सावंतवाडी येथील उपजिल्हा रुग्णालयात हलवण्यात आले. रुग्णालयात दाखल केल्यानंतर डॉक्टर आणि परिचारिकांनी त्यांच्यावर तातडीने उपचार सुरू केले.
घटनेची माहिती मिळताच महावितरणच्या वरिष्ठ अधिकाऱ्यांनी आणि सहकाऱ्यांनी रुग्णालयात धाव घेऊन त्यांच्या प्रकृतीची विचारपूस केली. तसेच, जीवनरक्षा वैद्यकीय प्रतिष्ठानचे अध्यक्ष यांनीही रुग्णालयात भेट दिली असून, जखमी कर्मचाऱ्याला सर्वोत्तम उपचार मिळावेत, अशी विनंती डॉक्टरांकडे केली आहे. अधिक उपचारासाठी गोवा बांबोळी येथे हलवण्यात आले
सुरक्षेचा प्रश्न पुन्हा ऐरणीवर
प्रज्योत नाईक यांची प्रकृती सध्या धोक्याबाहेर असल्याने त्यांचे कुटुंबीय, सहकारी आणि ग्रामस्थांनी सुटकेचा निश्वास सोडला आहे. मात्र, या घटनेमुळे वीज कर्मचाऱ्यांच्या सुरक्षेचा प्रश्न पुन्हा एकदा चर्चेत आला असून, कामाच्या ठिकाणी कर्मचाऱ्यांच्या सुरक्षिततेबाबत अधिक काळजी घेण्याची मागणी जोर धरत आहे.
