राजा दळवी
रिक्षाला जोरदार धडक; सुदैवाने चालक बचावला
वाहनचालकांमध्ये भीतीचे वातावरण; वनविभागाने बंदोबस्त करण्याची मागणी
कणकवली | प्रतिनिधी
कणकवली तालुक्यातील कळसुली परिसरात गव्यांचा वावर वाढल्याने नागरिकांमध्ये भीतीचे वातावरण निर्माण झाले आहे. दरम्यान, सोमवारी (दि. १ जून) रात्री ११.३० वाजण्याच्या सुमारास रस्त्यावरून जाणाऱ्या एका रिक्षेला गव्याने जोरदार धडक दिली. या अपघातात रिक्षेचे मोठे नुकसान झाले असून, रिक्षाचालक थोडक्यात बचावले आहेत.
नेमकी घटना काय?
मिळालेल्या माहितीनुसार, कळसुली येथील रहिवासी व रिक्षाचालक रविकांत सहदेव नाईक हे सोमवारी रात्री कणकवली येथून आपली रिक्षा घेऊन घरी परतत होते. कळसुली-जाभळ स्टॉप ते कळसुली घाटीकडे जात असताना अचानक समोरून आलेल्या गव्याने त्यांच्या रिक्षेच्या दर्शनी भागाला जोरदार धडक दिली.
या धडकेमुळे रिक्षेचा समोरील भाग पूर्णपणे चक्काचूर झाला आहे. सुदैवाने, या अपघातात रविकांत नाईक यांना केवळ किरकोळ दुखापत झाली असून मोठी जीवितहानी टळली आहे.
वनविभागाकडे कारवाईची मागणी
कळसुली मुख्य मार्गावर गवे आता दिवसाढवळ्या आणि रात्रीच्या वेळीही मोठ्या संख्येने दिसून येत आहेत. वन्यप्राण्यांच्या या वाढत्या वावरामुळे स्थानिक नागरिक व वाहनचालक धास्तावले आहेत. या मार्गावरून प्रवास करणे धोकादायक बनले असून, वारंवार होणाऱ्या या प्रकारांमुळे अपघातांचा धोका वाढला आहे.
या गंभीर परिस्थितीची दखल घेऊन वन विभागाने तातडीने योग्य त्या उपाययोजना कराव्यात आणि या गव्यांचा बंदोबस्त करावा, अशी मागणी आता कळसुली ग्रामस्थ व वाहनचालकांकडून जोर धरू लागली आहे.
