राजा दळवी
अतिक्रमणावरून हटाव वाद:
वैभव नाईक यांचा मुख्याधिकाऱ्यांना इशारा
कणकवली:
कणकवली शहरातील नरडवे रोडवरील श्रीधर नाईक चौक ते म्हसकर हॉस्पिटल दरम्यानची दुकाने व स्टॉल हटवण्याच्या नगरपंचायतीच्या निर्णयावरून आज मोठा वाद निर्माण झाला. केवळ एकाच भागातील अतिक्रमणे हटवण्याच्या मुख्याधिकारी गौरी पाटील यांच्या निर्णयावर आक्रमक होत, माजी आमदार तथा शिवसेना जिल्हाप्रमुख वैभव नाईक यांनी नगरपंचायत कार्यालयात धडक दिली आणि या कारवाईच्या दुजाभावाचा जाब विचारला.
नेमके प्रकरण काय?
सोमवारी नगरपंचायतीने स्पीकरवरून उद्घोषणा करत, नरडवे रोडवरील स्टॉल व दुकाने हटवण्याचे आदेश दिले होते. मात्र, केवळ विशिष्ट भागावरच कारवाई का, असा प्रश्न उपस्थित करत वैभव नाईक यांनी प्रशासनाच्या भूमिकेवर प्रश्नचिन्ह उपस्थित केले.
वैभव नाईक यांची भूमिका:
नगरपंचायतीमध्ये मुख्याधिकारी गौरी पाटील यांची भेट घेतल्यानंतर वैभव नाईक म्हणाले की, “शहरातील अतिक्रमणे हटवायची असतील तर ती सर्वांची हटवा, केवळ नरडवे रोडवरील गरीब स्टॉलधारकांना लक्ष्य करून त्यांच्यावर अन्याय करू नका. जर कारवाई करायची असेल, तर सर्वांना लेखी नोटिसा द्या आणि त्यांना पुरेसा वेळ द्या.”
यावेळी उपस्थित दुकानदारांनी सांगितले की, त्यांची दुकाने रस्त्यावर नसून ती फुटपाथच्याही बाहेर आहेत, त्यामुळे वाहतुकीला कोणताही अडथळा निर्माण होत नाही. तरीही प्रशासनाकडून केवळ याच रोडवरील अतिक्रमणे काढण्याची घाई का केली जात आहे, असा सवाल उपस्थित करण्यात आला.
मुख्याधिकाऱ्यांचे आश्वासन:
वैभव नाईक यांनी उपस्थित केलेल्या आक्षेपानंतर मुख्याधिकारी गौरी पाटील यांनी स्पष्ट केले की, सर्वच अतिक्रमणांवर कारवाई करण्यासाठी सर्वांना नोटिसा बजावल्या जातील. तसेच, उद्यापासून कणकवली बाजारपेठेतील सर्व अतिक्रमणे हटवण्यास सुरुवात केली जाईल, असेही त्यांनी नमूद केले.
यावर वैभव नाईक यांनी प्रशासनाला ठणकावून सांगितले की, “कारवाई करायची असेल तर ती भेदभाव न ठेवता सर्वांवर झाली पाहिजे.” या प्रकारामुळे कणकवलीतील अतिक्रमण हटाव मोहिमेवरून सध्या राजकीय वातावरण तापले असून, प्रशासन आता कोणती पावले उचलते, याकडे सर्वांचे लक्ष लागले आहे.
