राजा दळवी
स्वच्छ सुंदर झाराप
तंटामुक्त होणार?
तंटामुक्ती जबाबदारी!
उच्च न्यायालयापर्यंत पोहोचलेले तंटे आता गावच्या कट्ट्यावरच मिटणार का? ग्रामस्थांचा मिश्कील सवाल
सिंधुदुर्ग प्रतिनिधी | ता.30, कुडाळ
झाराप गावच्या तंटामुक्त समितीच्या अध्यक्षपदी अनिकेत तेंडोलकर यांची निवड करण्यात आली असून, त्यांच्या निवडीने गावातील तंट्यांना आता ‘पूर्णविराम’ मिळणार असल्याच्या अपेक्षा ग्रामस्थांकडून व्यक्त होत आहेत. विशेष म्हणजे, झारापमधील काही तंटे यापूर्वी थेट उच्च न्यायालयापर्यंत पोहोचले आहेत. त्यामुळे नव्या अध्यक्षांसमोरची जबाबदारीही तितकीच मोठी असल्याची चर्चा गावात रंगली आहे.
आतापर्यंत एखादा वाद निर्माण झाला की तो वाढत वाढत कुठपर्यंत पोहोचतो, याचा अनुभव झारापकरांनी घेतला आहे. आता मात्र “तंटा झाला तरी न्यायालयात जाण्यापूर्वी तेंडोलकरांच्या समितीची पायरी गाठायची,” अशी नवी पद्धत गावात सुरू होईल, अशी अपेक्षा व्यक्त केली जात आहे.
गावातील तंटे उच्च न्यायालयापर्यंत पोहोचले असताना तंटामुक्त समितीच्या अध्यक्षपदी झालेली ही निवड त्यामुळे विशेष चर्चेची ठरली आहे. “आता न्यायालयाची पायरी चढायची गरज नाही; आधी तंटामुक्त समितीची पायरी चढूया,” असा टोमणाही काही ग्रामस्थांनी मारला.गावातील छोटे-मोठे वाद, गैरसमज आणि कुरबुरी वेळेत मिटविण्यात समिती यशस्वी झाली, तर भविष्यात झारापचे तंटे न्यायालयाच्या दाराऐवजी गावाच्या चौकातच चर्चेतून मिटतील, अशी अपेक्षा आहे.
मात्र, तंटामुक्त समितीचे अध्यक्षपद मिळाले म्हणजे गाव आपोआप तंटामुक्त होत नाही; तंटे मिटविण्यासाठी संयम, संवाद आणि दोन्ही बाजूंना ऐकून घेण्याची तयारीही लागते. त्यामुळे आता तेंडोलकरांच्या अध्यक्षतेखाली समिती प्रत्यक्षात किती प्रभावीपणे काम करते, हे पाहणे औत्सुक्याचे ठरणार आहे.
दरम्यान, “आता झारापमध्ये तंटे होणारच नाहीत,” असा विश्वास काही ग्रामस्थांनी व्यक्त केला असून, गावात यापुढे शांतता आणि सलोखा नांदेल, अशी आशाही व्यक्त होत आहे.
उच्च न्यायालयापर्यंत गेलेल्या तंट्यांच्या गावाला आता तंटामुक्तीचा मार्ग दाखविण्याचे आव्हान अनिकेत तेंडोलकर स्वीकारणार का, याकडे झारापकरांचे लक्ष लागले आहे.
