राजा दळवी
कणकवलीत
‘उत्तरचंद्राची कोजागिरी’
अभिवाचन अनुभव
रसिकांचा संस्मरणीय प्रतिसाद!
कणकवली / प्रतिनिधी :
सिंधुदुर्ग जिल्ह्यातील कणकवली तालुक्यातील हळवल येथे ‘आपली सिंधुनगरी न्यूज चॅनेल’ निर्मित आणि प्रस्तुत ‘उत्तरचंद्राची कोजागिरी’ हा अनोखा अभिवाचन अनुभव कार्यक्रम अत्यंत उत्साहात सादर झाला. हळवल येथील ‘निलायम कृष्णकक्ष’ येथे रविवारी (०४ ऑक्टोबर २०२६) झालेल्या या प्रयोगाला कणकवलीतील विविध क्षेत्रातील मान्यवर आणि रसिक श्रोत्यांनी मोठ्या संख्येने उपस्थिती लावली.
कार्यक्रमाच्या सुरुवातीला ‘आपली सिंधुनगरी न्यूज चॅनेल’च्या सहसंपादक सानिका वायंगणकर यांनी उपस्थित मान्यवर श्रोत्यांचे स्वागत केले.
दर्जेदार सादरीकरण आणि सहभागी कलाकार
या कार्यक्रमाची संकल्पना व संहिता लेखन ज्येष्ठ लेखिका वैशाली पंडित यांची असून, यात प्रतिभावान कलाकारांच्या सादरीकरणाने रसिकांची मने जिंकली.
आजी: वैशाली पंडित
आजोबा: संजय शिंदे
सूत्रधार: अक्षय सातार्डेकर
सहकलाकार: डॉ. सुमेधा नाईक
तालवाद्य: वैभव मांजरेकर
संगीत संयोजन: विरेश वळंजू
अभिवाचन, संवाद, संगीत आणि तालवाद्याच्या सुरेल संगमातून साकारलेल्या या कार्यक्रमातून रसिकांना अत्यंत दर्जेदार व मार्मिक अनुभव घेता आला, अशी प्रतिक्रिया उपस्थितांनी व्यक्त केली.
मान्यवरांकडून विशेष कौतुक
सुप्रसिद्ध अभिनेते अभय खडपकर, सुप्रसिद्ध कवी प्रसाद कुलकर्णी, लेखक महेश काणेकर, निमंत्रक स्वर्गानंद ट्रॅव्हल्सच्या वतीने गीता कामत व डॉ. वैशाली कोरगावकर, तसेच संपदा प्रभुदेसाई यांच्यासह उपस्थितांनी या कार्यक्रमाची भरभरून प्रशंसा केली. अभिवाचनाच्या माध्यमातून कथानुभव अधिक प्रभावीपणे रसिकांपर्यंत पोहोचविण्याचा हा एक अभिनव प्रयोग असल्याचे त्यांनी नमूद केले. हा प्रयोग लवकरच संपूर्ण सिंधुदुर्ग जिल्ह्यासह महाराष्ट्र आणि देश-विदेशात पोहोचावा, अशा सदिच्छा यावेळी व्यक्त करण्यात आल्या.
यावेळी त्रिंबक आजगावकर, देवयानी आजगावकर, दिनेश गोगटे, मेघा गोगटे, महेश सावंत यांच्यासह अनेक रसिक श्रोते उपस्थित होते. ‘निलायम कृष्णकक्ष’चे वामन पंडित, ज्योती पंडित तसेच ध्वनीसंयोजक श्री. डंबे व सहकारी यांच्या सहकार्याबद्दल चॅनेलच्या वतीने आभार मानण्यात आले.
आगामी प्रयोग (वेळापत्रक)
‘आपली सिंधुनगरी न्यूज चॅनेल’चे विशेष सांस्कृतिक समन्वयक त्रिंबक आजगावकर व सौ. देवयानी आजगावकर यांनी ‘उत्तरचंद्राची कोजागिरी’च्या आगामी प्रयोगांची माहिती दिली असून, संपूर्ण संच खालील ठिकाणी प्रयोगासाठी सज्ज आहे:
मालवण: दत्त मंदिर भरड — दिनांक ७ ऑगस्ट २०२६ रोजी सायंकाळी ६:३० वाजता
वेंगुर्ले: बॅरिस्टर नाथ पै संकुल — दिनांक ११ ऑक्टोबर २०२६ रोजी सायंकाळी ४:०० वाजता
